Komuna e Suharekës nuk ka kryer asnjë shërbim sot që nga ora 8, kur fillon orari i punës, për shkak të mungesës së energjisë elektrike në këtë objekt.
Ali Gashi, një qytetar nga Suhareka, ka mbetur pa i marrë certifikatat për të cilat ai kishte shkuar në mëngjes në objektin e komunës.
Ai thotë se e ka të caktuar për nesër një termin për vizë në Ambasadën e Italisë.
“Po frikësohem se ka me m’humbë termini në ambasadë”, tha Ali Gashi për KALLXO.com.
Për fatin e keq të tij, sot nuk ka punuar as gjeneratori i komunës.
Zëdhënësi i komunës së Suharekës, Reshat Reshitaj, e ka konfirmuar këtë për KALLXO.com.
“Gjeneratori nuk është në funksion. Po presim që të vijë servisuesi i tij”, tha zëdhënësi Reshitaj.
Raportohet se punëtorët e komunës janë brenda ndërtesës duke qëndruar në pritje të rregullimit të situatës.