Ndihmës sekretaren e Shtetit të SHBA’së Evropë dhe Euro-Azi, Victoria Nuland është shprehur e kënaqur me punën e Kosovës në luftën kundër terrorizmit dhe parandalimin e qytetarëve që të marrin pjesë në luftëra terroriste.
Këto komente Nuland i ka bërë gjatë një takimi me Isa Mustafën.
Lexojeni të plotë njoftimin
Kryeministri i Republikës së Kosovës, Isa Mustafa, ka zhvilluar sot një takim me ndihmës sekretaren e Shtetit të SHBA-ve për Evropë dhe Euro-Azi, Victoria Nuland.
Ndihmës sekretarja Nuland ka uruar kryeministrin Mustafa për detyrën e re në udhëheqje të Qeverisë së Kosovës, duke shprehur përkrahjen e SHBA-ve për Qeverinë e re të Kosovës në të gjitha proceset, si në zhvillimin ekonomik dhe dialogun për normalizimin e marrëdhënieve ndërshtetërore ndërmjet Republikës së Kosovës dhe Republikës së Serbisë.
Gjatë takimit, u bisedua për vizitën zyrtare që kryeministri Isa Mustafa do të zhvillojë në SHBA ku do të zhvillojë takime të nivelit të lartë në Shtëpinë e Bardhë. Gjatë kësaj vizite, kryeministri Mustafa do të angazhohet edhe për të rritur bashkëpunimin dhe shkëmbimet ekonomike të Kosovës me SHBA-të.
Kryeministri i Kosovës, Isa Mustafa, ka shprehur mirënjohjen e popullit dhe institucioneve të Kosovës për përkrahjen e jashtëzakonshme që SHBA-të po japin për shtetin e Kosovës, në të gjitha fushat.
Kryeministri Mustafa po ashtu shprehu vendosmërinë dhe angazhimin e Kosovës për të qenë partner i plotë i SHBA-ve në luftën kundër terrorizmit dhe ekstremizmit të të gjitha formave.
Ndihmës sekretarja Nuland vlerësoi përkushtimin e Qeverisë Mustafa në luftën kundër terrorizmit, veçmas me procedimin e ligjit kundër pjesëmarrjes së kosovarëve në luftëra të huaja.