Ministria e Integrimeve Evropiane në Qeverinë e Kosovës ka qenë dhe vazhdon të jetë fort në duart e PDK-së. Këtë institucion të rëndësishëm të Qeverisë për gadi shtatë vite e pat udhëhequr pinjollja e Hashim Thaçit Vlora Çitaku e cila në mënyrë të befasishme u hodh në ujërat e diplomacisë së Kosovës- dhe atë si Konsulle e Përgjithshme e Kosovës në New York- pa ia sqaruar kurrë opinionit pse saktësisht ajo mori atë post.
Në Qeverinë e Isa Mustafës postin e Ministrit të Integrimeve Evropiane e ka marrë një prej po pinjollëve (më) të afërt të Hashim Thaçit- Bekim Çollaku. Ky i fundit, jo edhe fort i pranishëm në opinion më parë por për këtë i njohur për udhëheqësit partiakë të PDK-së si dora e djathtë e shefit, edhepse mori postin në fjalë- jo rrallë ose thënë saktësisht pothuajse gjithmonë shihet në afërsi të Hashim Thaçit. Bile, edhepse përgjegjës për Evropën, Çollaku udhëtoi edhe në SHBA ku Thaçi qëndroi për takime dhe “Lutjet e Mëngjesit” në Washington. Se çfarë ka të bëjë Ministria për Integrime Evropiane me “Lutjet e Mëngjesit” në Washington këtë mund ta dijë vetëm Çollaku.
I forti në prapavinë e PDK-së, Bekim Çollaku në karrierën e tij ende të shkurtër për Ministër ka vazhduar “gjurmëve” të Vlora Çitakut me premitme dhe tërheqje. Kështu ai në mënyrë indirekte ra ndesh me shefin e tij të Qeverisë- Isa Mustafën kur javën e kaluar tha se ai nuk pret që sivjet do të ketë liberalizim të vizave. Por pasi mediat raportuan për deklaratën e tij në Komisionin përgjegjës të Kuvendit të Kosovës, Çollaku bëri një tërheqje (taktike) dhe deklaroi që ai “nuk e din” se kur do ngjajë liberalizimi. Si Çitaku, edhe Çollaku ka filluar pokështu me “propagandën” kundër emigrimit ilegal. Dhe atë me “prodhime” banerësh e filmash të cilat s’ka si të jetë ndryshe pos në traditën e PDK-së: që këto prodhime filmike të “reklamohen” tek mediat (e afërta) të partisë në pushtet- PDK-së.
Por ajo që është dëshpëruese, pa i përmendur ato media ku MEI ka reklamuar është që nëse shihet kanali i “Youtube” ku MEI po “propagon” dhe po e “lufton” dukurinë në fjalë- del që ato qindra e diku edhe mija klikime nuk i shkojnë as për së afërmi numrit të refugjatëve që kanë ikur nga Kosova. Kjo tregon për pagjeturinë dhe kapërthurjen por para së gjithash korruptimin e jo vetëm “reklamave” por edhe vet ideve të cilat si Çollakut ashtu edhe bashkëpunëtorëve të tij u mungojnë në luftimin e kësaj dukurie. /Gazeta Blic