Lënda narkotike e llojit Kanabis sativa, sipas një komunikate të Doganës së Kosovës u zbulua në autobusin e linjës Tiranë-Prishtinë sot rreth orës 9 e 50 minuta.
Zbulimi ndodhi pasi zyrtarët doganorë zgjodhën këtë autobus për skanim dhe kontroll të detajuar.
Në raste të tilla, sqaron komunikata, zbriten të gjithë udhëtarët, ndërsa skanohet autobusi, bashkë me valixhet e udhëtarëve.
“Gjatë skanimit të valixheve te një udhëtar me shtetësi kosovare janë hasur në paketime të dyshimta. Gjithashtu edhe në autobus është gjetur një pako tjetër,” thuhet në komunikatën e Doganës.
Ky institucion tregoi edhe veprimet e ndërmarra nga zyrtarët doganorë pas zbulimit të drogës.
“Pas zbulimit të rastit është njoftuar policia kufitare që kanë bërë sigurimin e vendit të ngjarjes dhe ndalimin e personit të dyshuar dhe fillimin e hetimeve”, vijon komunikata.
Sasia e narkotikëve të zbuluar ka peshë prej gati dy kilogramësh. /PrizrenPress.com/