Buxheti i Kosovës vijon të dëmtohet nga sistemi gjyqësor, ndërkohë që njerëzit e këtij të fundit ngrehin zërin për rritje pagash. Sipas të dhënave të paraqitura nga Antikorrupsioni, janë vetë gjykatat që dëmtojnë buxhetin e shtetit, nëpërmjet procedimit të lëndëve të korrupsionit që janë kallëzuar penalisht në Prokurori nga AKK –ja.
Kjo e fundit përmes një letre adresuar Këshillit Gjyqësor të Kosovës, si dhe kryetarëve të gjykatave themelore të Kosovës, ka shprehur shqetësimin e saj në lidhje me mungesën e efikasitetit të këtyre institucioneve në trajtimin me seriozitet të rasteve (kallëzimeve penale) të paraqitura nga ana e Agjencisë, për sa i përket mosdeklarimit dhe deklarimit të rremë të pasurisë nga zyrtarët e lartë publikë. Bëhet fjalë për rastet e iniciuara për vitin 2014.
“Gjatë përfaqësimit të rasteve të iniciuara nga Agjencia është vërejtur se gjykatat themelore në Kosovë kanë aplikuar politikë joadekuate ndëshkimore, veçanërisht në lidhje me veprat penale të mosdeklarimit ose deklarimit të rremë të pasurisë nga zyrtarët e lartë publikë”, thuhet në letrën e Agjencisë./Kosova Sot/