Zëvendësministri i Punëve të Jashtme, Petrit Selimi, tash e pesë muaj po i nënshkruan vendimet në këtë dikaster qeveritar, ndonëse kjo është kompetencë vetëm e shefit të diplomacisë kosovare, Hashim Thaçi.
Selimi në vend të Thaçit i ka nënshkruar edhe propozimet për emërimin e ambasadorëve të Kosovës në vende të ndryshme të botës, veprim ky i cili konsiderohet antiligjor për shkak se Ligji për Ministrinë e Punëve të Jashtme nuk i jep një kompetencë të tillë zëvendësministrit.
Gazeta “Zëri” ka siguruar propozimin për emërimin e Leon Malazogut ambasador në Tokio të Japonisë, e të cilin dokument nuk e ka nënshkruar ministri Thaçi, por zëvendësi i tij, Petrit Selimi.
Burime të gazetës “Zëri” po ashtu kanë bërë të ditur se kryediplomati i Kosovës, përveç që nuk po e shfrytëzon zyrën e tij në këtë ministri, ai gjithashtu nuk po nënshkruan asnjë dokument të MPJ-së…