Javën e kaluar në Beograd është hapur ekspozita e artistëve kosovarë Artan Hajrullahu, Dardan Zhegrova dhe Art Haxhijakupi, e cila vazhdojë të jetë e hapur deri të enjten në galerinë G12 HUB, në Beograd.
Ekspozita e cila sjell tri artistë krejtësisht të ndryshëm nga njëri tjetri, është organizim i Zyrës së Komitetit të Helsinkit në Beograd, në kuadër të projektit “Kosova dhe Serbia: Akullthyesit kulturor.”
Në hapje të kësaj ekspozite të pranishme ishin edhe Sonia Biserko, drejtuesja e Zyrës së Komitetit të Helsinkit në Beograd, dhe historiania e artit Irina Subotic e cila mbajti një fjalim.
Për artistët pjesëmarrës kjo është hera e parë që ekspozojnë në Beograd, ndërsa projekti ka përfshirë edhe fusha të tjera të artit e kulturës në aktivete të cilat janë zhvilluar e do të vazhdojnë deri në fund të muajit qershor.
Projekti në fjalë nuk do të mbarojë me kaq. Mësohet se në fillim të tetorit të këtij viti do të jetë radha e artistëve nga Beogradi për të ekspozuar dhe shfaqur në Prishtinë veprat e tyre nga shumë fusha të artit. /Kallxo.com/