Rrjeti i Institucioneve të Pavarura të Artit dhe Kulturës (RRIPAK), dënon vendimin e fundit të Ministrisë së Kulturës, Rinisë dhe Sportit – MKRS drejtuar kundër Stacion – Qendra për Art Bashkëkohor Prishtinë.
RRIPAK konsideron këtë akt cenim të aktivitetit dhe programit të Stacion – Qendra për Art Bashkëkohor Prishtinë, dhe vazhdimësi e veprimeve të MKRS-së kundër institucioneve të pavarura të artit dhe kulturës në Kosovë.
Poashtu, RRIPAK vlerëson tejet zhgënjyese dhe shqetësuese mënyrën e komunikimit dhe ultimatumin e MKRS-së drejtuar Stacion – Qendra për Art Bashkëkohor Prishtinë.
Përveç demit që shkakton punës dhe raporteve MKRS – institucionet e pavarura të artit dhe kulturës, RRIPAK e sheh këtë veprim të MKRS si hakmarrje ndaj udhëheqësve të Stacion – Qendra për Art Bashkëkohor Prishtinë, që si pjese e RRIPAK janë kritik ndaj vendimeve dhe veprimeve të MKRS-së.
RRIPAK konsideron se veprime të tilla të MKRS-së përveç qe janë të dëmshme për veprimtarinë artistike, përbëjnë edhe kërcenim ndaj fjalës dhe mendimit të lire në Kosovë.
RRIPAK fton edhe një herë Kryeministrin e Kosovës Isa Mustafa që të shqyrtoj punën e Ministrit të Kulturës Kujtim Shala dhe kabinetit të tij, që në vazhdimësi nga marrja e mandatit me veprimet dhe vendimet e veta kanë dëmtuar rëndë shumicën dërmuese të institucioneve publike dhe të pavarura të artit dhe kulturës në Kosovë dhe kanë pamundësuar punën e artistëve të lirë.
Rrjeti i Institucioneve të Pavarura të Artit dhe Kulturës është organizatë e institucioneve të pavarura të artit dhe kulturës, e themeluar për të krijuar një mjedis të përshtatshëm formal, ligjor dhe funksional për punën e institucioneve të pavarura të artit dhe kulturës, zhvillimin e veprimtarisë së lirë shoqërore dhe artistike, demokratizmin dhe reformimin e politikave të artit dhe kulturës të institucioneve të pushtetit lokal dhe qendror në Kosovë.
Institucionet themeluese dhe anëtare të Rrjetit të Institucioneve të Pavarura të Artit dhe Kulturës janë: ALBANIADA, ARS KOSOVA, ANSAMBLI ATTACCA, ESTA KOSOVA, FESTIVALI 9/11, FESTIVALI DAM, FESTIVALI PIANISTI I RI, FESTIVALI PRIFEST, FESTIVALI REDO, FESTIVALI SKENA UP, FESTIVALI FRYMA E RE, GALERIA EXPO ART 40, GALERIA QAHILI, GALERIA OPEN ART, INICIATIVA E HISTORISE GOJORE, KOSOVO ARCHITECTURE FOUNDATION, LAMBDALAMBDALAMBDA, PRISHTINA JAZZ FESTIVAL, QENDRA KOSOVARE PER MUZIKEN E RE / FESTIVALI REMUSICA, SHOQATA KOSOVARE CHOPIN, SHKAS SYTHI / ETNO FEST, STACION – QENDRA PER ART BASHKEKOHOR PRISHTINË, TEATRI URBAN PRISHTINË, URBANIAK, VIART.
