Kitara akustike Gibson J – 160E e Jon Lennon, e përdorur në incizimin e The Beatles për “Please Please Me” dhe LP “With Beatles”, ka thyer të gjitha të parashikimet e vlerësimit, në një ankand të mbajtur të shtunën, kur ajo është shitur për 2.41 milionë dollarë – rekord ky për një kitarë me rëndësi historike të muzikës.
Lennon e kishte blerë atë në Rushworth’s Music House, në Liverpool, në shtator të vitit 1962, për 161 funte.
Kitara, që ishte konsideruar e humbur për më shumë se 40 vjet, pasi ishte “zhdukur mistershëm”, është shitur tri herë më shumë sesa vlera e supozuar e saj – 800 mijë dollarë – te një blerës që ka dashur të mbetet anonim.
Kitara Akustike Origjinale e John Lennon, J-160E Gibson, e vitit 1962.
Është e paqartë se si Lennon ishte ndarë nga ky instrument, që ishte përdorur për singlin e parë të The Beatles “Love Me Do” / “P.S. I Love You”, por edhe në të tjera hite të hershme të tyre si “I Want to Hold Your Hand” dhe “She Loves You”. Ajo qe rishfaqur në një dyqan muzike në San Diego në verën e vitit 1967. Sidoqoftë, blerësi nuk kishte pasur ide që ajo dikur i takonte John Lennon.
Prejardhja e kitarës u zbulua në vitin 2008.
Rëndësia e saj në historinë e The Beatles është e madhe, e lidhur ngushtë me fillimin e karrierës së tyre dhe është kitara më e veçantë e Lennon që është hedhur në ankand. /Politiko.net