Instituti Demokratik i Kosovës (KDI) ka publikuar raportin gjashtëmujor (Fletënoitimin) e monitorimit të punës së Kuvendit të Republikës së Kosovës për periudhën janar-qershor 2013. Në një konferencë për media, KDI ka paraqitur punën dhe angazhimet individuale të secilit deputet, grupeve parlamentare dhe komisioneve parlamentare.
KDI ka vlerësuar se kjo periudhë është karakterizuar me një kontroll sipërfaqësorë parlamentar, me një proces ligjbërës pa konsultime të nevojshme me publikun dhe faktorët tjerë relevant, dhe me një rol jo edhe aq përfaqësues të interesave të qytetarëve, gjë që ka dëshmuar se Kuvendi i Kosovës ka deficit të kulturës politike dhe parlamentare në kryerjen e obligimeve dhe mandatit kushtetues që ka.
“Edhe më tutje tema e cila po e mban nën dirigjim punën e Kuvendit të Kosovës, është çështja e dialogut mes Republikës së Kosovës dhe Republikës së Serbisë. Kjo temë ka derivuar debate të gjata dhe të ashpra, shmangie të shpeshta të Rregullores, fjalor jo-parlamentar, tensione deri në përdorim të dhunës fizike brenda dhe jashtë Kuvendit, duke lënë nën hije mandatin dhe instrumentet tjera kushtetuese që ka ky institucion përfaqësues”, thuhet në raportin e KDI-së.
Sipas këtij raporti komisioni parlamentar më aktiv është ai për Buxhet dhe Financa, me gjithsej 26 mbledhje. Pas tij renditet Komisioni për Zhvillim Ekonomik me 23 takime dhe ai për Bujqësi, Pylltari dhe Mjedis e Planifikim Hapësinor me 19 takime. Ndërsa komisioni më pasiv – apo me më pak mbledhje të mbajtura ka qenë ai për Mbikëqyrjen e AKI-së, me gjithsej 9 takime përgjatë gjashtë muajve. Ndërkohë, Nën-komisioni për Mandate dhe Imunitete, ka mbajtur vetëm 7 takime. Ndër tre komisionet me më pak mbledhje të mbajtura është edhe ai për Mbikëqyrjen e Financave Publike me 11 takime.
Sa i përket deputetëve ai Visar Ymeri i Vetëvendosjes, është shpallur si deputeti me aktiv në Kuvendin e Kosovës, ndërsa deputetja serbe, Rada Trajkoviq me pasivja. /PrizrenPress.com/
Deputetët më aktiv
1. Visar Ymeri 3.97 %
2. Halit Krasniqi 3.92 %
3. Alma Lama 3.10 %
4. Myzejene Selmani 2.86 %
5. Albulena Haxhiu 2.51 %
6. Ardian Gjini 2.30 %
7. Teuta Haxhiu 2.26 %
8. Time Kadriaj 2.26 %
9. Arben Gashi 2.13 %
10. Muhamet Mustafa 2.00%
11. Teuta Sahatqija 2.00 %
Deputetët më pasiv :
1. Rada Trajkovic – 0.33 %
2. Florin Krasniqi – 0.26 %
3. Sreten Ivanovic – 0.24 %
4. Skender Hyseni – 0.22 %
5. Sasha Gjokic – 0.20 %
6. Vesimir Savic – 0.15 %
7. Ukë Rugova – 0.15 %
8. Vesna Mikic – 0.11 %
9. Bali Muharremaj – 0.11 %
10. Azem Syla – 0.09 %