Deputeti i Kuvendit të Kosovës nga radhët e Lidhjes Demokratike të Kosovës (LDK), Anton Çuni, ka thënë se bërja e ushtrisë së Kosovës është në interes të gjithë qytetarëve pa dallime etnike.
Në mbledhjen e sotshme të Komisionit për Punë të Brendshme, Siguri dhe Mbikëqyrjen e FSK-së, ai u ka bërë thirrje serbëve të Kosovës që t’i heqin dilemat sa i përket transformimit të FSK-së. Ai ka shtuar se ushtria do t’i mbrojë edhe ata në rast të ndonjë rreziku.
“Formimi i ushtrisë është interes për të gjithë qytetarët e Kosovës, pasi ushtria mbron qytetarët e një vendi pa dallime etnike. Prandaj pala serbe le t’i heq dilemat për formimin e ushtrisë sepse Forcat e Kosovës do t’i mbrojnë dhe ata në rast të ndonjë rreziku”, ka deklaruar Çuni.
Në këtë takim nuk janë duke marrë pjesë deputetët e opozitës, prandaj, sipas Çunit, kjo e pengon funksionimin e punës normale të këtij komisioni. /Epoka e re