Avokati i kryetarit të Komunës së Malishevës kërkoi që të hidhet poshtë aktakuza meqë nuk është e karakterit penal por juridiko-civil. Këtë kërkesë e hodhi poshtë kryetari i trupit gjykues.
Në Gjykatën Themelore në Gjakovë sot është mbajtur shqyrtimi i dytë kundër kryetarit të Komunës së Malishevës, Ragip Begajt, i cili akuzohet për veprat penale të keqpërdorimit të pozitës apo autoritetit zyrtar.
Sipas aktakuzës së Prokurorisë Speciale të Kosovës i pandehuri Ragip Begaj gjatë muajve qershor-gusht të vitit 2014, në cilësinë e personit zyrtar, ka shpërdoruar pozitën zyrtare dhe autorizimet e tij, me qëllim që një të dëmtuari t’i shkaktojë dëm, duke ia shkelur të drejtat nga marrëdhënia e punës.
Në shqyrtimin fillestar, në janar, Begaj nuk e pranoi fajësinë.
Në seancën e sotme, Emrush Kastrati, avokati i të akuzuarit Begaj deklaroi se mbetet pranë pretendimeve të parashtruara me shkrim me parashtresën e dorëzuar në Gjykatë dhe shtoi se kjo çështje nuk është e karakterit penal, duke kërkuar pushimin e kësaj procedure.
“Potencojmë se këtu nuk kemi të bëjmë me çështje penale por kemi të bëjmë me karakter juridiko-civil. Prandaj, kryetarit të trupit gjykues i propozoj që aktakuzën e Prokurorisë Speciale të Republikës së Kosovës ta hedhë dhe ta pushojë procedurën penale ndaj të mbrojturit tim”, ka kërkuar avokati Kastrati.