Tri partitë opozitare, Lëvizja Vetëvendosje!, Aleanca për Ardhmërinë e Kosovës dhe Nisma për Kosovën, siç kishin paralajmëruar, të martën në orën 14:00 kanë nisur protestën, ditë e natë në shesh para Qeverisë së Kosovës kundër qeverisë dhe kundër zgjedhjes së Hashim Thaçit për president të vendit.
Protestuesit në shesh, ku kanë vendosur edhe tenda, tashmë kanë kaluar natën e parë dhe janë shprehur të vendosur se nga aty nuk do të largohen derisa qeveria të dorëhiqet dhe të shpalljen zgjedhjet e parakohshme parlamentare.
Pjesëtarë të shumtë të Policisë së Kosovës, që janë parë qysh në mëngjesin e djeshëm përreth objektit të Qeverisë së Kosovës dhe Kuvendit të Kosovës, e kanë kaluar po ashtu natën duke vëzhguar protestuesit e mbledhur në shesh.
