Perdet që zakonisht rrinë të lëshuara në skenën e madhe te Teatrit Kombëtar të Kosovës, kësaj radhe nuk ishin lëshuar fare. E mu në skenë tanimë veç ishin vendosur karriget, por jo për të parë ndonjë shfaqje apo performancë ose ndonjë koncert, por kësaj radhe në këtë skenë me një publik goxha të madh u promovua libri i aktorit të madh shqiptarë e tashmë të ndjerë Bekim Fehmiut.
“Shkëlqim dhe tmerr”, është pjesa e dytë e librit të Bekim Fehmiut, ku pjesa e parë përmbante jetën e tij personale, ndërsa pjesa e dytë e cila u promovua mesditën e së premtes flet për jetën e tij profesionale. Ky libër është një mundësi shumë e mirë për gjeneratat e reja, ata që duan ta njohin e të dinë më shumë për jetën dhe veprimtarinë e aktorit Bekim Fehmiut, pasi që, përmes këtyre botimeve do të dinë thuajse në saktësi atë që Bekimi ka bërë e përjetuar përgjatë viteve.
Të pranishëm për këtë promovim ishin familjarë, dashamirë dhe miq, të cilët e dëgjuan me vëmendje çdo fjalë që u tha, e çdo fjali që u lexua për Bekimi Fehmiun.
“Vetë vendi dhe koha në të cilën jetonte i kishin rezervuar atij përmbushjen e një misioni të madh në artin e shtatë, me të cilin art ngjashëm si titulli i librit të tij “Shkëlqim dhe tmerr”, si një gladiator i gadishullit ilirik do të identifikohej gjatë gjithë jetës së tij. Ai në vitet e fundit të jetës së tij na e la në dy vëllime dorëshkrimet e librit të tij “Shkëlqim dhe tmerr”, nëse pjesa e parë e këtij libri është saga e rinisë, fëmijërisë së hershme dhe familjes së tij, pjesa e dytë vjen si triler marramendës me krejt dritë hijet e jetës”, u shpreh regjisori Bekim Lumi i cili njëherësh ishte edhe lektor dhe korrektues i këtij libri.
Ky libër pjesë e bashkëpunimit në mes projektit “Mirëdita, dobar dan!” dhe Shtëpisë Botuese Samizdat B92. Ndërsa ndër të pranishmit në promovimin e sotëm ishte edhe drejtori i shtëpisë botuese Samizdat B92 Veran Matic, i cili tha para të pranishmëve se pas leximit të librit, ka filluar ta pëlqej jetën e Bekimit të fuqishëm, siç e quajti ai, dhe theksoi se jeta e tij është infektuese për të cilën nuk mund të flasësh shkurtimisht.
“Kam pasur fatin që të njoh një njeri të tillë. Pra përveç njerëzve që në mënyrë publike i kemi eksploratu, pra në atë kuptimin Trepça punon, Beogradi ndërton, kemi pasur në mesin e Beogradit, Prishtinës dhe Prizrenit në madhësi kulturore, shoqërore që i ka dhënë legjitimitet të keqes që nga viti 1976, kur ka qenë e qartë se e keqja fitoi kur Bekim Fehmiu vendosi që të ndërpres aktrimin dhe ndez ai plumbi që më vonë nuk u shkrep. Kam pasur rastin të punoj me të gjatë këtij viti dhe në pjesën e parë të biografisë “Shkëlqim dhe tmerr”, kur e kam lexuar dorëshkrimin kam parë se 95 për qind të gjërave nuk i kam ditur”, tha ndër të tjera Matic.
E krejt për fund përkthyesi i librit nga serbishtja në gjuhën shqipe, Anton Berishaj tha se është shumë i nderuar që iu dha rasti ta përkthej një libër të tillë me plot vlera. “Fillimisht e kisha pak kompleks të merrja një libër që qëndron në mesin e autobiografisë apo një ditari, por sidoqoftë shpresoj që kemi arritur ta bëjmë një përkthim korrekt”, u shpreh për fund Berishaj. Rikujtojmë se “Shkëlqim dhe tmerr”, do të promovohet edhe nesër në qytetin e Prizrenit në kinemanë DokuKino. /KultPlus.com/