Deputeti i Nismës për Kosovën Zafir Berisha, në një prononcim për gazetën “Kosova Sot” mendon se ky vend ka kapacitetet njerëzore, por edhe intelektuale që të kthjellet dhe t’i jepet fund njëherë e përgjithmonë kësaj garniture aktuale qeverisëse, e cila ia ka humbur shpresën qytetarit, e që kjo nuk është momentale, por në vazhdimësi ka humbur shpresa e tij.
Kjo pasi, sipas tij, me vite të tëra të keqqeverisjes ose siç e quan të qeverisjes në favor të klaneve dhe familjeve të caktuara mafioze, duke e gllabëruar kësisoj pasurinë e Kosovës përmes privatizimit dhe tenderomanisë.
Tutje Berisha thotë se edhe vetë qytetari i Kosovës duke të jetë aktiv në jetën publike, por edhe atë politike, duke marrë pjesë në zhvillimet e vendit dhe duke iu bashkuar përpjekjeve për ndryshim mund që të zgjidhë problemin, përndryshe, siç thotë, ‘Listat e Zeza’ mund të jenë lista, por avazi të vazhdojë edhe për shumë vjet.
“Pa e dashur ti shtëpinë tënde, askush nuk mund të detyroj nga jashtë për ta dashtë me zor, në fakt ne jemi në stadin që shtëpinë tonë jemi duke e vjedhur dhe në momentin kur e bën këtë, s’ka se si të mbrojë tjetërkush”, ka theksuar Berisha.
“Unë mendoj se ndërkombëtarët janë në dijeni më mirë se çdokush tjetër për njerëzit e korruptuar, pasi siç dihet drejtësinë për një dekadë e më shumë e kanë udhëhequr vetë ata, të cilët kanë qenë pjesë e krimit të organizuar”.
Ai nënvizon se ata njerëz që e kanë sjellë këtë gjendje duhet të shkojnë në burg, pasi faktet janë evidente, veçse duhet të hapen arkivat dhe dosjet që mbahen fshehtë, si nga ndërkombë- tarët, por edhe nga një pjesë e vendorëve.
“Nëse ne nuk e bëjmë këtë hap, do të vuajmë kështu edhe për një dekadë tjetër, pasi nuk pritet që punët tona të na i rregullojë Evropa e as Amerika, por ato duhet t’i rregullojmë vetë me ndihmën e ndërkombëtarëve”, tha ai.
(Kosova Sot)