Gjykimi ndaj drejtorit komunal për arsim në Suharekë, Sherif Berisha, do të fillojë me 5 prill të këtij viti. Kjo pasi që i njëjti nuk ka bërë ankesë ndaj aktvendimit të gjykatës me të cilin është refuzuar kërkesa e tij për hudhjen e aktakuzës e cila e ngarkon me veprën penale “keqpërdorim të detyrës apo autoritetit zyrtar”.
Gjatë shqyrtimit të dytë, i mbajtur të mërkurën në Gjykatën Themelore në Prizren, mbrojtësi i të akuzuarit, avokati Brahim Sopa, ka thënë se nuk do të parashtrojë ankesë ndaj aktvendimit në fjalë, me arsye që të mos zvarritet procedura.Kërkesën për hudhje të aktakuzës avokati Sopa, e ka parashtruar pas mbajtjes së shqyrtimit fillestar të mbajtur më 23 janar 2017.
Në kërkesë thuhej se aktakuza është e parakohshme sepse vendimi për të cilin akuzohet Berisha se nuk e ka zbatuar, ende nuk është i plotfuqishëm. Tutje ka shtuar se ndaj vendimit të Sektorit për Inspeksion të Arsimit, avokati komunës sa Suharekës, ka ushtruar ankesë dhe lënda ende gjendet në Ministrinë e Arsimit Shkencës dhe Teknologjisë.
Ndryshe, në dhjetor 2016, Prokuroria Themelore në Prizren, ka ngritur aktakuzë ndaj Sherif Berishës, të cilin e akuzon se në cilësinë e drejtorit të Drejtorisë Komunale të Arsimit në Suharekë, nuk ka respektuar një rekomandim të Sektorit të Inspeksionit për Arsim (SIA) në Prizren, për anulimin e konkursit për mësimdhënës.
SIA kishte rekomanduar që konkursi për rekrutimin e mësimdhënësve për shkollën e mesme profesionale “Abdyl Rama” në Suharekë, të anulohet dhe të ri-shpallet në afat prej 8 ditësh.Sipas organit të akuzës, me këto veprime i akuzuari ka kryer veprën penale të keqpërdorimit të detyrës zyrtare dhe ka shkelur rëndë të drejtat e personave tjerë, konkurrues në konkursin në fjalë.
Berisha poashtu është duke u gjykuar edhe në një rast tjetër penal, në të cilin akuzohet se ka punësuar, pa konkurs, rreth 9 mësimdhënës, në shkollat e Komunës së Suharekës./betimiperdrejtesi/