Administratori i bazës së të dhënave në Policinë e Kosovës, Hajrush Lenjani, të hënën, gjatë shqyrtimit gjyqësor ndaj të akuzuarit për keqpërdorim të informatës zyrtare, rreshterit Nuredin Begolli, ka thënë se në databazë mund të fusin të dhëna vetëm personat e autorizuar, ndërsa qasje mund të kenë edhe zyrtarët tjerë policorë.
Gjatë shqyrtimit të mbajtur në Gjykatën Themelore në Prizren, dëshmitari Lenjani ka thënë se në databazë regjistrohen të dhënat për incidente, aksidente, veprat penale dhe kundërvajtëse, vendimet dhe urdhëresat e gjykatës. Ai ka shtuar se këto të dhëna mund t’i fusin në sistem ose t’i ndryshojnë vetëm personat përgjegjës, ndërsa janë zyrtarët tjerë të cilët vetëm mund t’i lexojnë të dhënat, por jo edhe t’i ndryshojnë.
Ky dëshmitar ka thënë se çdo zyrtar policor ka adresën e tij të regjistruar në sistem andaj, sipas tij, cilido që qaset në sistem e lëshon një gjurmë që tregon se është qasur dhe çfarë ka kërkuar. Po ashtu ka thënë se për periudhën e caktuar, për të cilën interesohet gjykata, mund të përpilojë një raport me të cilin tregon nëse është kyçur i akuzuari në sistem.
Pas dëgjimit të dëshmitarit, mbrojtësi i të akuzuarit, avokati Hajrip Krasniqi, ka propozuar që të kërkohet nga Policia e Kosovës, Drejtoria e Teknologjisë Informative, që të përpilohet një raport nëse i mbrojturi i tij është qasur në këtë sistem për të parë dosjen e të dëmtuarit.
I akuzuari, Nuredin Begolli, ka propozuar që raporti të përfshijë çfarëdo qasje të tij në sistem, jo vetëm për të dëmtuarin Deli Hoxha, por edhe për cilindo qytetar tjetër.
Prokurori Genc Nixha, ka deklaruar se eksperti mund të përpilojë një raport sa i përket aktakuzës e që përkon me muajt shtator, tetor dhe nëntor 2015, nëse i akuzuari është qasur në sistem për të parë dosjen kriminale të të dëmtuarit Hoxha.
Në anën tjetër, përfaqësuesja e palës së dëmtuar, avokatja Emira Gavazaj-Gashi, nuk është pajtuar me propozimin e prokurorit, pasi që, sipas saj, kjo çështje penale vetëm po zgjatet pa nevojë sepse nga administrimi i deritanishëm i provave dhe dëgjimi i dëshmitarëve është vërtetuar aktakuza.
Trupi gjykues, i udhëhequr nga gjyqtarja Raime Elezi, ka aprovuar propozimet e prokurorit dhe mbrojtjes, për të kërkuar nga Policia e Kosovës një raport sa i përket qasjes së të akuzuarit në bazën e të dhënave kriminale.
Po ashtu, kryetarja e trupit gjykues, Elezi, ka thënë se seancën e radhës do ta caktojë pasi që ta pranojë raportin në fjalë nga Policia e Kosovës.
Rreshteri i Policisë së Kosovës, Nuredin Begolli, akuzohet nga Prokuroria Themelore në Prizren, se në cilësinë e zyrtarit policor, ka zbuluar informatën zyrtare për personin tjetër, duke i dhënë atij një përparësi që nuk i takon.
Sipas aktakuzës, Begolli ka njoftuar qytetaren Altina Kolukaj, për numrin e veprave penale dhe të kundërvajtjes, të kryera nga qytetari Deli Hoxha, e i cili informacion, ka ndikuar në prishjen e raporteve në mes këtyre dy personave./betimiperdrejtesi/