Vendimin e Kuvendit të Kosovës që Prizreni të jetë kryeqytet historik e kanë mirëpritur prizrenasit. Ata thonë se qyteti i tyre e meriton një epitet të tillë, megjithatë u tha se nevojiten fonde për ruajtjen e tij.
Objektit të Lidhjes së Prizrenit, Kalasë e shumë monumenteve të tjera po iu njihet vlera. Prizreni po e pret vetëm nënshkrimin e presidentit Hashim Thaçi që edhe zyrtarisht të shpallet kryeqyteti historik i Kosovës.
Vendimin e morën deputetët duke e votuar në pako me Prishtinën si kryeqytet administrativ.
E për historianin Përparim Kosova vota e ligjvënësve e vërteton rolin historik që bart ky qytet në vete.
‘Shpresojmë që në të ardhmen përsëri Prizrenit do t’i kthehet epiteti i kryeqytetit të Shqipërisë”, tha Kosova.
Sikur ai mendojnë edhe të tjerë.
“Nëse Prizreni nuk e meriton atëherë nuk e meriton asnjë qytet tjetër”.
E kryetari i Prizrenit Mytaher Haskuka po pret që në të ardhmen amandamenti ta kapërcejë karakterin simbolik duke u plotësuar përmbajtësisht me ligje dhe fonde të ndara.
“Unë si deputet por edhe tash si kryetar i Komunës kërkojë që të krijohet një fond i veçantë nga ana e qeverisë për intervenime të drejtpërdrejta në Qendrën Historike të Prizrenit në mënyrë që me e mbrojt atë që ka mbet”, tha Haskuka.
Njohja me ligj e epitetit historik është hapi i dytë i madh i qeverisë aktuale për njohjen e vlerave të Prizrenit.
Por i pari që nënkuptonte bartjen e Ministrisë së Kulturës në Prizren nuk është realizuar ende. /Insajderi