Rastin gjyqësor të rigjykimit të Antigona Morinës nuk do ta gjykoi gjyqtari i njëjtë.
Gjykata Themelore e Gjakovës ka marrë vendim që ta përjashtoi gjykatësin Mizahir Shabani nga ky proces pas kërkesës së mbrojtjes së familjes së dëmtuar e cila kishte gjetur pa rregullsi në këtë çështje penale, raporton KTV.
Kjo gjykatë vendosi që gjyqtarja Ilirjana Hoti ta gjykoi Hilmi Zenën ish – bashkëshortin e Antigonës , i cili akuzohet për shkelje të detyrimeve familjare.
Në aktvendim thuhet se arsye e marrjes së këtij vendimi është se gjyqtari Shabani ka lejuar që i njëjti avokat mbrojtjes të jetë edhe i palës së akuzuar por edhe i palës së dëmtuar.
“Duke u bazuar në nenin 39 paragrafi 3 të Kodit të Procedurës Penale, ku është e përcaktuar se gjyqtari mund të përjashtohet nëse vërtetohen rrethanat që e vejnë në dyshim paanshmërinë e gjyqtarit, si dhe bazuar edhe në faktin se aktgjykimi i Gjykatës së Rahovecit është prishur me aktvendim të Gjykatës së Apelit”, thuhet në përgjigjen nga Gjykata Themelore e Gjakovës.
Gjithashtu aty thuhet se me qëllim të rritjes së besueshmërisë dhe paanshmërisë ndaj gjykatës është marrë vendimi.
Mbrojtja e ka mirëpritur këtë vendim të Gjykatës dhe beson se shumë shpejt do të caktohet edhe data e mbajtjes së seancës gjyqësore.
Kohavisioni, në vazhdimësi, ka raportuar lidhur me vdekjen e Antigona Morinës, e cila vdiq 6 vjet më parë, tri ditë pasi u martua, për shkak të hemorragjisë së vazhdueshme, e burri i saj Hilmiu nuk i kishte ofruar ndihmë mjekësore së ndjerës.
Në deklaratën e dhënë atëkohë në Prokurori, ai kishte thënë se sipas traditës, të ndjerën Antigonën e kishte dërguar te shehu, ditën e dytë të martesës.