PDK distancohet nga veprimet e asamblistit Bardh Avdaj, ky i fundit kërkon falje për veprimin e tij
Gjatë ditës së djeshme në mbledhjen e Kuvendit Komunal në Prizren, kuvendari i PDK-së, Bardh Avdaj, e ka gjuajtur me shishe të ujit kryesuesin e Kuvendit të Prizrenit, Artan Abrashi.
Shefi i grupit të PDK-së, Simir Krasniqi për KALLXO.com ka thënë se veprimi i Bardh Avdaj ka qenë individual dhe ai ka vepruar nën afekt.
“Ka qenë veprim individual dhe personi i cili e ka bërë atë veprim ka kërkuar falje publikisht, ka qenë nën afekt ky veprim. Këto gjëra ndodhin edhe në parlamentin e Kosovës dihet nga cila parti, nga ajo që është në pushtet në Prizren”, ka thënë Krasniqi.
Asamblisti i PDK ka kërkuar falje publike përmes një statusi në Facebook për veprimet e djeshme duke thënë se e gjitha ka qenë eskalim situate.
“Gjithçka që ka qenë, ishte thjeshtë një eskalim situate, i nxitur nga krerët e Kuvendit. I kisha lutur të gjithë që ta përcjellin tërë seancën dhe aty do shihet se si e drejta ime për replikë është mohuar. Unë me profesion jam fizioterapeut dhe synimi im është të ruaj shëndetin e qytetarëve, e jo ta dëmtoj, prandaj kjo që ndodhi ishte një eskalim i situatës për të cilën ndihem keq”, ka shkruar Avdaj.