Kryeministri i Kosovës, Hashim Thaçi, ai i Shqipërisë Edi Rama dhe ministri i Jashtëm, Enver Hoxhaj kanë zhvilluar një takim në Nju Jork me mikun e Kosovës ish-presidentin Bill Clinton.
Ministri Hoxhaj në rrjetin social “Facebook” ka postuar një foto të përbashkët me ish-presidentin Clinton. “Sot së bashku me kryeministrat Thaçi dhe Rama takuam mikun tonë të përjetshëm presidentin Clinton, i cili vazhdon të mbështesë Kosovën në procesin e shtetndërtimit dhe integrimeve euro-atlantike”, ka shkruar Hoxhaj.
Kryeministri Hashim Thaci, sot në mëngjes ka marrë pjesë në hapjen zyrtare të sesionit vjetor plenar të Iniciativës Globale Klinton, që mbahet në Nju Jork. “Në margjina të kësaj ngjarje shumë të rëndësishme, kryeministri i Republikës së Kosovës, Hashim Thaçi është takuar me presidentin Clinton, me të cilin ka diskutuar progresin e deritanishëm të shtetit të Kosovës dhe sfidat me të cilat po ballafaqohet Kosova ne rrugën e saj për ta zënë vendin e merituar në mesin e shteteve demokratike të botës”, është thënë në njoftimin e Qeverisë.
Thaçi në kuadër të kësaj konference është takuar me liderë të shteteve të ndryshme të botës.