I akuzuari për shmangie nga tatimi, Behlul Limaj e ka pranuar fajësinë, në seancën e së mërkurës, në Gjykatën Themelore në Gjakovë, dega në Malishevë.
Pas leximit të aktakuzës nga prokurori Bajram Kryeziu, i akuzuari Limaj ka thënë se e ndien veten fajtor, duke kërkuar nga gjykata që ndaj tij të shqiptohet një dënim sa më i butë.
Prokurori Kryeziu, nuk e ka kundërshtuar pranimin e fajësisë nga i akuzuari Limaj, raporton “Betimi për Drejtësi”.
Ndërsa, në seancë kanë prezantuar edhe përfaqësuesi Administratës Tatimore të Kosovës (ATK), Shpend Pllana, i cili deklaroi se nuk parashtron kërkesë pasurore juridike, pasi që në bazë të pasqyrës tatimore të 13 shkurtit 2019, i akuzuari nuk ka borxh të pashlyer ndaj ATK-së.
Kurse sa i përket dënimit eventual ndaj të akuzuarit, Pllana deklaroi se i’a lë gjykatës që të vendos në bazë të ligjeve në fuqi
Gjykatësi i çështjes, Njazi Morina ka aprovuar pranimin e fajësisë nga ana e të akuzuarit, ndërsa atë e ka njoftuar se shpallja e aktgjykimit do të bëhet më 15 shkurt 2019, në ora 10:00.
Ndryshe, sipas aktakuzës së Prokurorisë Themelore në Gjakovë, të ngritur më 29 nëntor 2018, Behlul Limaj, po akuzohet se më 21 prill dhe më 25 maj 2016, në cilësinë e pronarit të subjektit tatimor N.H. “Kështjella”, në fshatin Banjë të Malishevës, i është shmangur tatimit të veprimtarisë së tij në biznesin e lartcekur, duke mos i përfshirë të dhënat lidhur me të ardhurat e tij.
Sipas aktakuzës, kjo gjendje është konstatuar nga ATK-ja pas kontrollimit të dy printerëve, të cilët kanë rezultuar të jenë përdorur për printimin e kuponëve jo fiskal, me qëllim të shmangies nga tatimi, dhe të dy printerët janë konfiskuar nga ATK-ja.
Për këto veprime, i akuzuari ngarkohet me veprën penale “shmangie nga tatimi”, nga neni 313, paragraf 1, të KPRK-së. /BetimipërDrejtësi