Mbrëmë në Gjonaj të Hasit, është mbajtur nata finale e edicionit të 30-të jubilar të festivalit tradicional folklorik “ Hasi jehon”, ku janë përzgjedhur edhe ansamblet dhe individët më të dalluar të festivalit, transmeton TV Prizreni.
Për tre netë rresht në Gjonaj të Hasit është mbajtur edicioni i 30-të i festivalit tradicional folklorik “ Hasi jehon 2019”, pjesë e të cilit ishin rreth 20 Ansamble të ndryshme nga Kosova, Shqipëria, Maqedonia dhe Mali i Zi. Juria profesionale e festivalit, mbrëmë ka përzgjedhur edhe Ansamblet dhe individët më të dalluar të edicionit jubilar të “ Hasi jehon”.
Fitues i çmimit “ Lahuta”, është përzgjedhur Qendra Kulturore “ Kaçaniku”, ndërsa çmimi “ Malësorja”, sipas jurisë i ka takuar SHKA “ Bresana” nga Opoja e Dragashit.
Befasi ishte ansambli “Nakem” nga Bursa e Turqisë, i cili solli në skenë koreografi krejt shqiptare, ani pse anëtarët e këtij ansambli flisnin vetëm pak fjalë shqip.
Të parët e tyre kishin migruar që mbi 60 vjet në Turqi, por trashëgimtarët e tyre ruajnë traditën dhe kulturën shqiptare. Prandaj, juria e vlerësoi me çmimin kryesor “Malësori”.
Për të gjithë të dalluarit e përzgjedhur, organizatorët e festivalit shpërndanë trofe dhe mirënjohje./TV Prizreni/