Kandidati i LDK-së për kryetar të Prizrenit, Eqrem Kryeziu tërthorazi ka ‘thumbuar’ vendimin e kryeministrit të Kosovës, Hashim Thaçit, për themelimin e komunave në Has.Ai në fshatin Romaj dhe Planejë të Hasit, tha se LDK-ja nuk premton komuna për vota. “Ne nuk premtojmë komuna për vota, por ofrojmë shërbime për qytetarët”. Kryeziu premtoi se LDK-ja do të realizojë të gjitha kërkesat që vijnë nga Hasi. “Shumë projekte në Has i kemi realizuar atëherë kur buxhetin e kemi pasur minimal dhe do t’i realizojmë edhe tash kur buxheti i Komunës së Prizrenit është i dhjetëfishuar”.
Ai kujtoi se në kohën kur ka qenë kryetar i Prizrenit, ka pas zëra nënçmues për investimet që bënte në Has.
“Bile na patën akuzuar se këtë po e bëjmë për vota. Por, jo për vota sepse Hasi ishte dhe mbeti me Lidhjen Demokratike të Kosovës dhe s’kishim nevojë të mashtronim askënd. E vërteta ishte dhe mbetet se ato investime në Has i bëmë për shkak të diskriminimit shekullor që pushtetet paraprake ia bënë Hasit”, tha Kryeziu.
Ai tha se në Has punët emergjente janë kryer para vitit 2007. ”Tani do të vazhdojmë bashkërisht të punojmë për modernizmin e Hasit”. /PrizrenPress.com/