Presidentja e Kosovës, Atifete Jahjaga dhe kryeministri Hashim Thaçi, uruan besimtarët islam dhe udhëheqjen e Bashkësisë Islame të Kosovës me rastin e Festës së Kurban Bajramit.
”Uroj që kjo të jetë një ditë e gëzuar për të gjithë ju, një ditë të cilën do ta kaloni me familjet dhe me më të dashurit tuaj, duke shprehur respektin dhe dashurinë për njëri-tjetrin. Uroj që dita e Kurban Bajramit t’ju gjejë të bashkuar e të gëzuar, me të mirat dhe begatitë që na i ka falur Zoti. Lutem që, edhe sot, të përkujtojmë të gjithë ata që nuk janë më në mesin tonë, ata që punuan që ne të gëzojmë kohën në të cilën jetojmë. Në këtë ditë feste, le të shohim rreth nesh ata që kanë nevojë për ndihmën tonë dhe le t’ua zgjasim atyre dorën e ndihmës. Madhështia e festës së Kurban Bajramit është pikërisht në solidaritetin dhe ndihmën për të tjerët”, thuhet mes tjerash në urimin e Presidentes për Festën e Kurban Bajramit.
Ndërsa, në urimin e tij, kryeministri Thaçi thekson se “Qeveria e Kosovës do të vazhdojë të jetë e angazhuar thellësisht, për mirëqenien dhe të ardhmen e ndritur për të gjithë qytetarëve të vet”
“Festa e Kurban Bajramit e lartëson shpirtin e besimtarëve, forcon besimin në Zot, i bashkon ata, ngrit ndjenjat e solidaritetit ndër njerëzorë dhe zgjon idenë e sakrificës për të mirën e përgjithshme., Edhe këtë vit, Festa e Kurban Bajramit e gjen Kosovën në rrugën e ndërtimit të shoqërisë së lirë, demokratike dhe paqësore, me respekt të ndërsjellë nga të gjithë qytetarët tanë. Shteti ynë po vazhdon rrugën drejt zhvillimit të qëndrueshëm ekonomik, rritjes së mirëqenies për të gjithë qytetarët e saj, pa dallim feje dhe etnie, ku respektimi i të drejtave dhe lirive njerëzore janë kushte themelore të demokracisë së shtetit tonë të ri”, thuhet ndër tjerash në urimin e Thaçit. /PrizrenPress.com/