Në Gjykatën Themelore në Gjakovë, dega në Rahovec, nga dita e reduktimit të aktiviteteve të gjykatave për shkak të koronavirusit e deri më tani, nuk është mbajtur asnjë seancë për raste të natyrës urgjente.
Pas konfirmimit të rasteve të para pozitive me koronavirus në Kosovës, Këshilli Gjyqësor i Kosovës (KGJK) kishte marrë vendim për reduktimin e të gjitha aktiviteteve në kuadër të KGJK-së dhe atyre të Gjykatave të Kosovës.
Përmes një njoftimi për media, KGJK kishte bërë të ditur se kryetarët e gjykatave duhet të caktojnë gjyqtarët dhe stafin administrativ të mjaftueshëm për të kujdestaruar dhe realizuar vetëm veprimtaritë e natyrës urgjente.
“Ato të caktimit të masave për sigurimin e prezencës së të pandehurve-paraburgimit apo masave tjera, rastet e dhunës në familje, masave tjera si dhe rasteve tjera urgjente që eventualisht mund të paraqiten”, thuhej në njoftim.
Gjykatësi mbikëqyrës i degës në Rahovec, Jonuz Bugari, për “Betimi për Drejtësi”, ka thënë se ka ndërmarrë të gjitha veprimet në përputhje me vendimin e KGJK-së dhe se deri më tash në këtë gjykatë nuk është paraqitur asnjë kërkesë për sigurimin e masës së paraburgimit apo masave tjera për sigurimin e prezencës së të pandehurve.
Bugari ka bërë të ditur se ka caktuar edhe gjyqtarët kujdestarë, dhe atë, gjykatësin Ilir Rashkaj për Departamentin e Përgjithshëm- Divizioni Penal dhe gjykatësin Betim Behluli për Departamentin e Përgjithshëm- Divizioni Civil.
Në anën tjetër, në Rahovec po respektohet edhe vendimi i Qeverisë së Republikës së Kosovës, për mbylljen e bizneseve, raporton “Betimi për Drejtësi”.
Sipas drejtorit të Inspektorateve në Komunën e Rahovecit, Besnik Hoti, të gjitha bizneset në Rahovec po zbatojnë në përpikmëri vendimin e Qeverisë, të marrë si masë parandaluese për mbrojtje nga pandemia globale, koronavirus.
Ndryshe, të premten e 13 marsit 2020, në Kosovë janë identifikuar rastet e para të infektimit me koronavirusin COVID-19, kurse deri më tani numri i të infektuarve ka shkuar në 16. /BetimipërDrejtësi