Në Prizren, të gjitha restauronte, kafiteritë dhe qendrat tregtare janë duke e respektuar vendimin e Qeverisë së Republikës së Kosovës për mbrojtjen nga virusi COVID-19, thotë për “Betimi për Drejtësi”, drejtori i Inspektoratit në Komunën e Prizrenit, Islam Thaqi.
Ai ka thënë që në përgjithësi vendimi i Qeverisë së Republikës së Kosovës, është duke u respektuar, edhe pse sipas tij në disa zonë më të thella, gjatë orëve të mbrëmjes ka pasur tentime për hapje të disa kafiterive, mirëpo me intervenimin e inspektoratit të Komunës dhe Policisë, është evituar hapja e tyre.
Më tej, Thaqi shtoi se që nga nesër do të kryejnë inspektime së bashku me policinë e departamentit për krime të rënda dhe me inspektorët e ATK-së.
Edhe zyra për media e Policisë së Kosovës në rajonin e Prizrenit, ka konfirmuar se përveç një rasti që ka ndodhur të dielën, në kafiterin “Toni” në të cilën ka pasur edhe sulm ndaj policisë nga pronari i kafiterisë “Toni”, rast ky që tashmë është në procedurë penale, nuk ka raste të tjera në të cilat nuk është respektuar vendimi i Qeverisë së Kosovës.
“Betimi për Drejtësi” ka bërë përpjekje për të kontaktuar me Prokurorin Themelore në
Prizren, në lidhje me këtë rast, mirëpo ka qenë pamundur.
Në anën tjetër, zëdhënësja e Gjykatës Themelore në Prizren, ende nuk ka ofruar të dhëna në lidhje me funksionimin e kësaj gjykate, me arsyetimin se më vonë do të bëhet informimi i publikut.