Në moshën 71 vjeçare, ka ndërruar jetë rokeri legjendar Lou Reed. Ende nuk është bërë publik shkaku i vdekjes së këngëtarit të “The Velvet Underground”, ndonëse vitet e fundit ka pasur probleme me mëlçinë. Pas largimit nga grupi, në vitin 1972 këngëtari dhe kitaristi filloi karrierën e tij solo, ndërsa nga hitet e tij më të mëdha janë “Perfect Day” e “Walk On The Wild Side”.
Kantautori amerikan lindi në vitin 1942 në Brooklyn, ndërsa është rritur në Long Island. Gjatë studimeve filloi të merrej me muzikë dhe në vitet ’60 nisi karrierën si muzikant.
Së bashku me John Cale themeloi grupin e parë, “The Primitives”, të cilit ia ndërruan emrin në “The Warlocks”, kurse pas njohjes me Sterling Morrison dhe Maureen Tucker, themeluan grupin “The Velvet Underground”.
