Numri i rasteve aktive me covid-19 në Komunën e Malishevës, ka shkuar në 3 raste, pasi sonte është konfirmuar edhe një rast i ri. Rasti është konfirmuar në komunikimin zyrtar të Komunës së Malishevës, me Institutin Kombëtar të Shëndetësisë Publike të Kosovës.
Edhe rasti i sotëm, sipas konfirmimit është rast kontakti me një rast të mëhershëm.
Përndryshe, situata me pandeminë COVID-19 në territorin e Komunës së Malishevës, vazhdon të jetë nën kontroll, ndërsa shtabi komunal emergjent në vazhdimësi është duke ju bërë thirrje qytetarëve, që të respektojnë të gjitha rekomandimet e institucioneve shëndetësore.
“Ne jemi të angazhuar në menaxhim të situatës 24 orë në ditë, por për të qenë të gjithë të sigurt, duhet që të vazhdojmë ti respektojmë udhëzimet e institucioneve tona shëndetësore, prandaj vazhdoni të mbani distancën e nevojshme sociale, përdorni maska mbrojtëse, mbani higjienën e nevojshme të duarve dhe në maksimum t’iu ikni grumbullimeve të njerëzve në dyqane, markete, lokale, apo para institucioneve bankare e postave”, tha sot nënkryetari i Komunës së Malishevës, Hajdin Berisha, në emër të shtabit komunal emergjent për menaxhimin e situatës me COVID-19 në Malishevë, duke ju bërë edhe njëherë thirrje qytetarëve për kujdes të shtuar.