Në mbledhjen e mbajtur me pjesëmarrjen e kryetarit të Komunës së Prizrenit, Mytaher Haskuka dhe drejtoreshës për Kulturë, Rini dhe Sport, Emilija Redzepi rreth mënyrës së organizimit të manifestimit të 31-të të Festivalit të këngës së lehtë “Zambaku i Prizrenit”, për shkak të kushteve të krijuara nga situata e pandemisë COVID 19, është vendosur që sivjet festivali të organizohet gjysmë-live pa prezencën e publikut në bahçen “Kino Lumbardhi”.
“Për shkak të masave të përcaktuara për parandalimin e përhapjes së virusit COVID-19, u vendos që ky manifestim i festivalit të mbahet më 5 shtator 2020, pa prezencën e publikut, i cili do të transmetohet në kanale televizive për të gjithë teleshikuesit”, thuhet në njoftim të Komunës.
DKRS gjithashtu ka zgjatur afatin për pranimin e këngëve konkurruese për festival, duke vendosur datën e fundit më 7 gusht 2020.
DKRS fton të gjithë krijuesit dhe interpretuesit e këngës dhe muzikës së lehtë, të aplikojnë në konkurrim për pjesëmarrje në këtë manifestim.
Sipas njoftimit bëhet e ditur se të gjithë qytetarët mund të votojnë online./PrizrenPress.com
