Partitë politike që kanë shkuar në balotazh po nxitojnë me hapa të shpejtë për ta zënë “trenin e fundit” që të lidhin koalicione me partitë që janë diskualifikuar në rrethin e parë. Në këto dy-tri ditët e fundit kanë arritur disa koalicione ndërmjet partive politike, ndërsa kur është në pyetje pushteti, partitë po i thyejnë parimet, duke bërë koalicion me rivalin e përbetuar.
Këtë e dëshmon fakti që në disa komuna janë arritur koalicione ndërmjet PDK-së e AAK-së, e që do të jenë në “luftë” me LDK-në, ndërsa në disa komuna tjera janë bërë koalicione ndërmjet LDK-së e AAK-së, në “luftë” me PDK-në.
Ndërsa si variant i mundshëm në disa komuna është edhe koalicioni i “viganëve” LDK-së dhe PDK-së. E vetmja që ka mbetur jashtë këtij mishmashi, është lëvizja Vetëvendosje.
Sipas zëdhënësit të Vetëvendosjes, Erzen Vraniqi, këto koalicione vetëm sa e dëshmojnë se këto parti janë klane dhe grupe të interesit, qëllimi i të cilave është pushteti me çdo kusht.
“Kjo më së miri e shpjegon se këto janë klane dhe grupe të interesit, të maskuara pas emërtimit parti politike, pa koncept, pa program e pa parime, qëllimi kryesor i të cilëve është pushteti me çdo kusht”, ka deklaruar Vraniqi për Zërin.
Ai më tej ka shtuar se këto parti, politikën e konsiderojnë si pazar dhe se nuk brengosen për premtimet e dhëna gjatë fushatës parazgjedhore.
“Kur të gjitha këto parti e kanë pranuar dialogun me Serbinë pa kusht, ku po dëmtohet sovraniteti i vendit, aq më pak mërziten për premtimet e tyre elektorale”, ka shtuar Vraniqi.
Në anën tjetër, anëtarja e Kryesisë së Lidhjes Demokratike të Kosovës, Vjosa Osmani, ka thënë se këto koalicione, në rastin e kësaj partie janë koalicione të ndërtuara mbi parime.
“Në rastin e LDK-së janë koalicione parimore, por që janë varur shumë nga specifikat e secilës komunë dhe e kemi lënë në duart e degëve që të vendosin”, ka thënë ajo.