Kryetari aktual i Komunës së Rahovecit, Smajl Latifi, i cili po garon për një mandat të dytë për ta drejtuar këtë komunë, sot në mbrëmje ka takuar studentët rahovecianë.
Kandidati i AAK-së për kryetar të Komunës, Smajl Latifi në vlugun e fushatës zgjedhore, ka lënë për pak kohë Rahovecin dhe ka dalë në Prishtinë, ku është pritur nga rreth 300 studentë, të cilët kanë dëgjuar dhe bashkëbiseduar për planin e kandidatit të AAK-së, për zhvillimin e komunës në katër vitet e ardhshme.
Latifi u ka premtuar atyre, se rinia, edhe në mandatin e ardhshëm do të ketë vend të merituar në qeverisjen e tij. Ai u ka rikujtuar atyre, se në mandatin që po përfundon, kabinetin e tij qeverisës e ka pasur të përbërë kryesisht nga të rinj, energjia e të cilëve, është dëshmuar edhe punë,transmeton telegrafi.
Formë tjetër të punësimit të të rinjve, Latifi ka premtuar edhe përmes sektorit privat dhe investimeve të huaja që do të rrisin mundësinë e vendeve të reja të punës në këtë komunë, me resurse të mëdha, sidomos në sektorin e bujqësisë.