Nxënësit e komunitetit boshnjakë dhe turkë të komunës së Prizrenit janë pajisur për herë të parë me abetaren e gjuhës shqipe, përmes së cilës do të kenë mundësi të mësojnë shkrim- leximin.
Shpërndarja e librave nisi në shkollën fillore dhe të mesme të ulët “Motrat Qiriazi” në Prizren, nga zyrtarët e lartë të arsimit. Projekti do të vazhdojë edhe në komunat tjera të Kosovës të banuara me popullatë të përzier.
Ndonëse nxënësit e komuniteteve pakicë janë të obliguar me ligj të mësojnë gjuhen jo amtare kjo nuk kishte ndodhur 14 vjet pas luftës, pasi që librat u kishin munguar. Abetarja e re e botuar këtyre ditëve nga MASHT për nxënësit boshnjakë dhe turkë, do të jetë një mundësi e mirë që ata të mësojnë shkrim- leximin tha zëvendësministri i arsimit, Osman Ballgji, transmeton RTK.
Ndërkaq drejtori komunal i arsimit, Nexhat Çocaj, tha se për nxënësit që kanë filluar ta mësojnë si gjuhë të tretë shqipen, libri i botuar do t”ua lehtësojë atyre por edhe mësimdhënësve punën bukur shumë.
Mësuesja Alma Bajrami me përkatësi boshnjake tha se libri do t”u jep mundësinë nxënësve të mësojnë gjuhën e atij lokaliteti ku edhe jetojnë.
”Mendoj se ky libër është një mundësi e mirë për mësimdhënie dhe mësimnxënje, pasi që përmes tij nxënësit e komuniteteve do të pasurohen edhe me një gjuhë” tha Bajrami.
Projekti ka nisur së zbatuari në komunën e Prizrenit, ndërsa do të vazhdojë edhe në komuna tjera të Kosovës të banuara me popllatë të përzier.