Me rastin e shënimit të 23-vjetorit të Epopesë së UÇK-së, drejtorët e drejtorive të Komunës së Prizrenit, Osman Hajdari, Edon Muçaj dhe Agron Limani, së bashku me përfaqësuesit e organizatave të dala nga lufta, familjet e dëshmorëve dhe pjesëtarët e Forcës së Sigurisë së Kosovës, kanë bërë homazhe në varrezat e dëshmorëve në Landovicë, ku nderuan dëshmorët dhe martirët e kombit.
Me këtë rast, në emër të Komunës së Prizrenit, drejtori i Drejtorisë së Administratës, Osman Hajdari, deklaroi se sot janë këtu për të nderuar sakrificën e madhe të familjes Jashari dhe për t’i nderuar dëshmorët dhe martirët e kombit, që ishin bazament i lirisë së Kosovës.
Pas kësaj, aktivitetet e Komunës së Prizrenit për shënimin e 23-vjetorit të Epopesë së UÇK-së, vazhduan me homazhet tek: Lapidari i Ismail Kryeziut, Lapidari i Gjergj Kastriot Skënderbeut, Lapidari i Pal Palucës, Lapidari i Xhevat Berishës, Lapidari i Komandant Kumanovës – Ismet Jashari, Lapidari i Remzi Ademajt, Lapidari i Komandant Drinit – Ekrem Rexha.