Pas 23 vitesh, heroi i kombit Selajdin Berisha, do ta ketë shtatoren e merituar, kurse Prizreni, Sheshin e UÇK-së.
Në kuadër të aktiviteteve të organizuara për nder të përvjetorit të Epopesë së Vërrinit, që është një nga ngjarjet më të dhimbshme, por edhe më të lavdishme të luftës çlirimtare në zonën e Prizrenit, u inaugurua shtatorja e heroit të kombit, Selajdin Berisha.
Kryetari i Prizrenit, Mytaher Haskuka tha se Komandant Berisha kishte një personalitet me virtyte të larta njerëzore e patriotike dhe ishte një sportist i dalluar, i cili është shembull se si duhet të punohet, veprohet dhe të flijohet për atdheun.
“Në kuadër të këtij projekti të realizuar nga Drejtoria e Administratës, kemi rregulluar edhe hapësirën ku është vendosur shtatorja, duke e quajtur si Sheshi i UÇK-së, ku do të përkujtohet sakrifica e Ushtrisë Çlirimtare të Kosovës, e cila na ka mundësuar që sot ta gëzojmë lirinë dhe shtetin tonë të pavarur!”, tha Haskuka.