Dogana e Kosovës ka reaguar pasi gjatë dy ditëve të fundit disa markete shitën një litër vaj me çmim prej 3 euro e 49 centë.
Nëpërmjet një komunikate për media ky institucion ka bërë të ditur se në periudhën janar-shkurt dhe një pjesë të muajit mars, në vend janë importuar 3.3 milionë litra vaj luledielli dhe 1.4 milion litra vaj luledielli i papërpunuar, njofton Klankosova.tv.
Tutje, Dogana bën të ditur edhe çmimin e vajrave ushqimore të importuara.
“Derisa në vitin 2022 (periudha Janar -Shkurt dhe një pjesë e marsit) në Kosovë janë importuar 3.3 milionë litra vaj luledielli i përpunuar dhe 1.4 milion litra vaj luledielli i papërpunuar. Vajrat ushqimore në import kanë variuar në çmim gjatë vitit këtyre dy muajve nga 1.22 euro/cent deri në 1.45 euro/cent”.
Dogana për këtë çështje ka analizuar çmimet e të vitit 2021.
“Gjatë vitit 2021 në total janë importuar vaj luledielli I përpunuar rreth 17.7 milionë litra vaj derisa janë importuar edhe 5 milionë litra vaj luledielli i papërpunuar. Vajrat ushqimore në import kanë variuar në çmim gjatë vitit 2021 duke filluar 1.11 euro/cent në janar të 2021 e ka shënuar rritje ne 1.44 euro/cent në dhjetor të vitit 2021, derisa taksat që paguan një litër vaj në import është TVSH-ja e reduktuar 8%. Derisa vajrat e papërpunuara nuk paguajnë asnjë taksë pasi konsiderohen lëndë e parë për prodhim”, thuhet në komunikatën e Doganës.
Mes tjerash, thuhet se Dogana e Kosovës në bashkëpunim me autoritetet kompetente do të vazhdojë të ushtroj kontrolle në kuadër të realizimit të detyrave dhe përgjegjësive të saj, me qëllimin e vetëm parandalimin e veprimtarive ilegale në të gjithë territorin e Republikës së Kosovës.