Kryeministri i Kosovës, Albin Kurti, ka thënë se marrëveshja me Serbinë nuk do të jetë e lehtë.
Në një intervistë për televizionin N1 të Bosnjës, Kurti ka thënë se është student i Demaçit, përderisa presidentin serb Vuçiq, e ka quajtur student të Sheshelit.
“Aleksandar Vuçiq, presidenti i Serbisë sot, është student politik i Vojisllav Sheshelit. Ndërsa unë, si Kryeministër i Republikës së Kosovës, unë jam student politik i Adem Demaçit. Dhe ky ballafaqim, kjo përplasje ndërmjet Kryeministrit të Kosovës dhe presidentit të Serbisë, është në një mënyrë thelbësore, përplasje ndërmjet Adem Demaçit, atij vizioni dhe asaj trashëgimie dhe Vojisllav Sheshelit në anën tjetër. Andaj unë e pranoj që marrëveshja mes Kosovës dhe Serbisë nuk do të jetë e lehtë, por megjithatë mendoj që duhet t’i jepet shancë dialogut dhe të shpresojmë e të punojmë për më mirë.”, ka thënë Kurti.
Kjo deklaratë është publikuar në faqen e Vetëvendosjes në facebook.