Presidentja e vendit, Vjosa Osmani është parë të premten pasdite në Ulqin të Malit të Zi së bashku me kryeministrin shqiptar Edi Rama dhe kryeministrin e Malit të Zi, Dritan Abazoviq.
E para e vendit po merr pjesë me ftesë të kryetarit të Ulqinit në koncertin e tenorit, Ramë Lahaj, kanë konfirmuar zyrtarë për medie të Presidencës së Kosovës.
“Presidentja dhe familja e saj janë ftuar nga Kryetari i Ulqinit në koncertin e tenorit Ramë Lahaj dhe aktivitetet përcjellëse se bashku me liderët e tjerë dhe shumë mysafirë të tjerë pjesëmarrës” – tha Bekim Kupina, këshilltar për media në presidencë.
Zyrtarisht, në Mal të Zi nisi sezoni turistik këtë vit, ndërsa për këtë u organizua edhe një mbrëmje ku koncert mbajti tenori me famë botërore, Ramë Lahaj.
Rama kritik ndaj Kosovës
Takimet mes liderëve të Kosovës dhe kryeministrit shqiptar, Edi Rama, nuk janë zhvilluar kohëve të fundit, pas zhvillimeve në veriun e Kosovës.
Rama, në disa paraqitje të fundit për publikun ka adresuar kritika për drejtuesit e institucioneve kosovare, duke thënë se duhet të pranojnë propozimet e ndërkombëtarëve për shtensionimin e situatës në katër komunat e veriut të vendit.