Dhuna e shfaqur në turneun e Superkupës së Kosovës në basketboll rrezikon të ketë pasoja të mëdha për nikoqirin, Golden Eagle Ylli.
Shaqir Palushi, që është pronar i “Golden Eagle” ka shkruar të hënën se do të shqyrtoj investimet në sport e basketboll. Golden Eagle është sponsori kryesor i Golden Eagle Yllit. Kompania e Palushit ka dhjetë vjet që sponsorizon në sportin kosovar.
“Në fundjavën që lamë pas në Suharekë është zhvilluar Superkupa e Kosovës në basketboll. Ngjarjet që kanë ndodhur në palestër dhe jashtë saj gjatë komplet organizimit i kanë lënë shije të keqe organizatorëve dhe vetë trofeut. Ne si kompani e ndiejmë të nevojshme të reagojmë. Duke i parë nga afër zhvillimet e fundit jemi të detyruar të shqyrtojmë investimet tona në sport e basketboll. Shpresojmë dhe bëjmë thirrje që skenat e dhunës të marrin fund e kurrsesi të mos përsëriten sepse po i druhemi më të keqes e që urojmë të mos ndodhë kurrë. I bëjmë thirrjeve institucioneve përgjegjëse të marrin veprimet e duhura për parandalim të dhunës”, ka shkruar Palushi në një postim në rrjetet sociale, postim që e ka shpërndarë edhe Ylli i Suharekës.