Ka nisur projekti i asfaltimit të rrugës Dragash-Brod. Ky është projekt i Ministrisë së Infrastrukturës që ka kushtuar mbi 2.5 milionë euro dhe përfundon para sezonit të turizmit dimëror.
Që nga viti 2018, rruga Dragash-Brod ishte në gjendje shumë të keqe. Vizitorët dhe taksistët thonë se e kishin të vështirë t`i vizitonin këto pjesë të bukura të natyrës. Por tani, këtij problemi po i vjen fundi.
“Dy herë në vit vij këtu, rrugën po më vjen shumë mirë që jeni duke e rregulluar, sepse vij shpesh këtu në skijim dhe jam shumë i gëzueshëm”, tha një vizitor.
“Kemi besuar se do të bëhet , por më vështirë ishte për njerëzit që e frekuentonin shpesh këtë rrugë”, tha Sevgin Lika, taksist.
Banorët pritën gati 5 vjet, por tani janë të kënaqur që puna për asfaltimin e rrugës ka filluar.
” Normalisht që ka me qenë më mirë, por duhet pasur kujdes , rruga po zgjerohet dhe do të vozitin shpejt”, tha një banor i zonës.
Drejtori i Urbanizmit në këtë komunë, Bean Haxhihasan, thotë se mbi 10 kilometra të këtij segmenti rrugor do të asfaltohen para sezonit dimëror.
” Para disa ditësh ka nis asfaltimi i rrugës Brod-Dragash ose Dragash-Brod, në gjatësi prej 10 km, ky projekt është planifikuar nga viti 2018 , por për shkak të rrethanave të njohura, firma nuk ka punuar , ky projekt kap vlerën prej 2.5 milion dhe financohet nga ministria e infrastrukturës . Sipas deklarimeve të operatorit ekonomik , rruga do të përfundojë pa nisur sezoni dimëror”, tha Bean Haxhihasan, drejtor i Urbanizmit, Dragash.
Mungesa e infrastrukturës rrugore ka bërë që edhe numri i vizitorëve të jetë më i vogël këtë verë në këto vende turistike, thonë përfaqësuesit e bizneseve.