Në Prizren ka filluar sot mësimi joformal, në nivelin fillor dhe të mesëm të ulët (Klasa 1-9).
Drejtoresha e DKA-së në Prizren, Luljeta Veselaj-Gutaj tha se ky program do t’ju shërbejë nxënësve që për shkaqe të ndryshme nuk kanë pasur mundësi të përfundojnë shkollimin.
“Janë bërë të gjitha përgatitjet për mbarëvajtje të këtij programi, duke filluar nga krijimi i ekipit të veçantë të mësimdhënësve”, tha ajo, transmeton TV Prizreni.
Sipas saj, ky ishte një premtim i dhënë nga kryetari i Komunës, Shaqir Totaj.
Drejtoria Komunale e Arsimit në Prizren, me mbështetjen e kryetarit të Komunës, Shaqir Totaj, vitin e kaluar pati hapur thirrjen për organizimin e arsimit joformal , për të gjithë ata/ato që nuk e kanë përfunduar shkollimin nëntëvjeçar.
Zyrtari i lartë i Drejtorisë Komunale të Arsimit në Prizren, Reshit Kushaj, ka njoftuar se deri më tani janë 97 nxënës të regjistruar, të cilët po zhvillojnë mësimin joformal .
Ai ka bërë të ditur se nga e hëna e ardhshme do të kenë mundësi të aplikojnë edhe vijues të tjerë të cilët janë të interesuar të përfundojnë arsimin fillor dhe të pajisen me dëftesa./PrizrenPress.com/