Ramush Haradinaj, lider i Aleancës për Ardhmërinë e Kosovës (AAK), vizitoi sot Suharekën dhe vlerësoi përkushtimin e komunës për zhvillim dhe progres.
“Sot pata kënaqësinë të vizitoj Suharekën, një komunë që simbolizon suksesin dhe potencialin e vërtetë të Kosovës. Nën udhëheqjen e Aleancës dhe kryetarit Bali Muharremaj, Suhareka ka shndërruar sfidat në mundësi, duke treguar se çfarë mund të arrihet me vizion dhe përkushtim”, shkruan Haradinaj, në llogarinë e tij në Facebook.
Ai e përgëzoi Suharekën për përurimin e Shtëpisë së Kulturës “Ukë Bytyçi” dhe e theksoi rolin e qeverisjes lokale në këtë sukses. “Përurimi i Shtëpisë së Kulturës ‘Ukë Bytyçi’ është vetëm një shembull i progresit të jashtëzakonshëm që po bëhet këtu. Por, ky sukses vjen nga qeverisja lokale, jo si rezultat i politikave të qeverisë aktuale. Komunat tona po luftojnë të përparojnë pa mbështetje të duhur nga niveli qendror.”
Haradinaj përfundoi duke theksuar potencialin e komunave për të arritur suksese të ngjashme me mbështetje adekuate. “Ne në AAK besojmë se çdo komunë në Kosovë ka potencialin për të arritur suksese të ngjashme. Me politika të duhura, kryetarë të përkushtuar dhe mbështetje aktive nga qeveria, mund të krijojmë një mjedis ku komunat zhvillohen, e cilësia e jetës së qytetarëve rritet. Suharekë, urime Shtëpinë e Kulturës.”/PrizrenPress.com/
Marketing
