Këshilli Komunal për Siguri në Bashkësi në Komunën e Dragashit ka mbajtur mbledhjen e parë për këtë vit, ku përfaqësues të organeve të rendit kanë pohuar se gjendja e sigurisë është e qetë dhe stabile.
Sipas njoftimit të Komunës, në këtë takim është paraqitur vlerësimi i përgjithshëm i gjendjes së sigurisë në territorin e Komunës së Dragashit, duke përfshirë edhe festat e fundvitit; pastaj analiza e sigurisë për vitin 2024, siguria në trafik, si dhe veprimet e masat për luftimin e shkelësve të ligjit, sikurse edhe monitorimi dhe raportimi mbi nivelin e sigurisë në shkolla dhe zbatimi i Planit për Siguri në Shkolla.
“Në dy pikat e para të rendit të ditës raportuan komandanti i Stacionit Policor në Dragash, Shaqir Uka, dhe komandanti i Vijës Kufitare, Jeton Hulaj. Bazuar në këto raportime, gjendja e përgjithshme e sigurisë në territorin e Komunës së Dragashit u vlerësua e qetë dhe stabile”, thuhet në njoftim.
Ndërsa në pikën e katërt të rendit të ditës ka raportuar drejtori i DKA-së, Zeni Krasniqi, lidhur me zbatimin e Planit për Siguri në Shkolla dhe aktivitetet e ndërmarra me qëllim të ruajtjes së sigurisë në institucionet arsimore të Komunës së Dragashit.
