Komuna e Prizrenit ka njoftuar se Agjencia Kadastrale e Kosovës do të fillojë rindërtimin e Kadastrit në zonat Zhur, Lez, Landovicë, Lubinje e Poshtme dhe Pllanjanë.
Qëllimi i projektit, sipas komunikatës së Komunës së Prizrenit, është harmonizimi i gjendjes faktike në terren me të dhënat në Kadastër.
“Përfitimet kryesore nga ky projekt janë: Zyrtarizimi i të drejtave pronësore jo kontestimore mbi pronat e paluajtshme, për rastet e trashëgimive; Zyrtarizimi i shitblerjeve të kryera përmes marrëveshjes jo formale/gojore; Realizimi i matjeve gjeodezike dhe përgatitja e dosjeve për proces të legalizimit”, thuhet në njoftim.
Tutje theksohet se faza e parë e këtij projekti është takimi informues me banorët e zonës ku do të njoftohen për planin e rindërtimit, dinamikën e realizimit dhe rëndësinë e tij; obligimet dhe përgjegjësitë e Agjencisë Kadastrale të Kosovës, Zyrës Kadastrale Komunale dhe Komunës; obligimet e Operatorit Ekonomik në zbatimin e planit të rindërtimit, dhe të drejtat dhe obligimet e banorëve të Zonës Kadastrale në procesin e rindërtimit.
“Të gjitha punët dhe aktivitetet në kuadër të këtij projekti do të kryhen pa pagesë”, përfundon njoftimi.
