Kryetari i degës së Lidhjes Demokratike të Kosovës në Prizren, Eqrem Kryeziu duket se i ka ditët e numëruara në këtë post. Pas humbjes në zgjedhjet e fundit të LDK-së në këtë qytet, shumë nëndegë të kësaj partie në këtë rajon po kërkojnë largimin e tij.
Një burim i Gazetës Blic, brenda kësaj dege ka thënë se po priten zgjedhjet nacionale, dhe menjëherë do të fillojnë procedurat për shkarkimin e Eqës, nëse ky i fundit nuk jep dorëheqje. “Tani kur jemi në prag të zgjedhjeve nacionale, nuk po na lejojnë nga “lart” që të bëjmë zhurmë për shkarkimin e z. Kryeziu, për faktin se mund të dëmtohet partia.
Mirëpo, menjëherë pas përfundimit të zgjedhjeve, do t’i fillojmë procedurat për shkarkimin e tij, nëse nuk jep dorëheqje”.
Ndërkohë, një zyrtar tjetër i LDK-së, ka bërë të ditur se Eqrem Kryeziu nuk e ka ndërmend të jap dorëheqje. Madje ai në një mbledhje të Kryesisë së Degës me ironi ka thënë se “nuk ka kujt t’ia lë partinë”.
Sipas burimeve tashmë një pjesë e madhe e anëtarësisë së kësaj dege, ka filluar të identifikojë kandidatin e mundshëm, i cili do ta pasojë Eqrem Kryeziun në krye të Degës së LDK-së në Prizren.