Një vit më parë, më 19 prill 2013, kryeministri Hashim Thaçi dhe homologu i tij serb, Ivica Daçiq nënshkruan në Bruksel Marrëveshjen për Normalizimin e Marrëdhënieve ndërmjet dy vendeve.
Kjo marrëveshje e garantuar nga BE-ja dhe e quajtur historike, nuk ka dhënë rezultatet e pritur, madje nga analistët politikë dhe nga opozita kosovare konsiderohet marrëveshje e dështuar. Derisa kryeministri, Hashim Thaçi, vazhdon ta quajë historike, ka të tillë që mendojnë se kjo marrëveshja u bë vetëm për t’ia plotësuar agjendën evropiane Serbisë.
Ndryshe, një vit pas, gjendja ka mbetur e njëtrajtshme në veri, me struktura që nuk i njohin institucionet e Kosovës dhe me barrikada në rrugë. Vetëm zgjedhjet dhe policia mund të konsiderohen hapa pozitivë, të tjerat kanë mbetur të njëjta.
Kryeministri Thaçi nëpërmjet një komunikate thotë se kjo marrëveshje ka mbyllur kapitullin e përgjakur ndërmjet dy popujve dhe ka hapur kapitullin e paqes dhe të fqinjësisë së mirë. Sipas Thaçit zbatimi i kësaj marrëveshje ka dhënë rezultate të konsiderueshme./zeri/