Repriza e filmit “Tri dritare dhe një varje”, më 5 shtator, e terminit 22:00 është rezervuar për mbledhjen e mjeteve të cilat do të grumbullohen nga biletat e shitura dhe do të shkojnë në një fond për gratë e dhunuara prej serbeve gjatë luftës së fundit në Kosovë. Për këtë vendim ka njoftuar për KultPlus, Miradije Vllahiu drejtoreshë në Kompaninë për Distribuim dhe Promovim të Filmit “Genci”.
Filmi “Tri dritare dhe një varje”, me regji të Isa Qosës që për bosht ka dhimbjen e një gruaje që është dhunuar nga serbët, gjatë luftës së fundit në Kosovë, pos qasjes artistike duket që do të grumbulloj edhe një fond për gratë të cilat kanë pas të njëjtin fat, sikurse Lushja, personazhi kryesor i këtij filmi.
Pas vendimit të producentit të filmit, Shkumbin Istrefi, i mbështetur edhe nga ekipi i tij se mjetet e grumbulluara nga prezantimi i këtij filmi në kinemanë ABC do të shkojnë për këtë fond, edhe drejtuesit e kinemasë ABC kanë vendosur që ti bashkohen kësaj nisme.
“Ne kemi vendosur që repriza e datës 5 shtator, e terminit të orës 22:00 të shërbejë për këtë fond. Të hyrat e kësaj mbrëmje do të shkojnë për gratë e dhunuara gjatë luftës”, ka thënë për KultPlus, Miradije Vllahiu, drejtoreshë në Kompaninë për Distribuim dhe Promovim të Filmit “Genci”.
Sipas saj, hyrja për të parë këtë film do të jetë 3 euro, dhe të gjitha mjetet nga ky termin do të dedikohen për këtë fond.
Ndërkohë, filmi “Tri dritare dhe një varje”, premierën kombëtare do ta ketë në dy vende, një në kinemanë ABC, që do të filloj në ora 19:30, ndërkaq ajo e Teatrit Kombëtar të Kosovës që realizohet nën patronazhin e presidentes së vendit, Atifete Jahjaga do të jetë në ora 20:00. Kurse premiera për gazetarë do të jetë në po të njëjtën ditë, me fillim në ora 13:00.