Shkruan: Skender Susuri, prof
Vendimmarrjet në Komunën e Prizrenit shoqërohen me shkelje të dukshme të dispozitave ligjore, arbitraritet, politizim dhe klientelizëm. Shumë zyrtarë të lartë komunal pjesën e madhe të orarit të punës e kalojnë në séanca gjygjësore, tani më ka edhe aktvendime të gjykatave, me të cilat është vërtetuar fajësia e tyre, por abuzimet , arbitrariteti dhe klientelizmi ( favorizimi i një rrethi të ngusht njerzish – miqësh) vazhdojnë, janë në trend, janë shtrirë në të gjitha zyrat e komunës, duke u bërë “kulturë e punës – vendimmarrjes”. Punësimi nuk bazohet në rregullat formale të konkursit , por në rregullat parciale të klientelizmit. Klientelizmi nuk ka të bëjë vetëm me favorizim, ka të bëjë edhe me diskriminim, duke ju mohuar dikujt një të drejtë themelore dhe e mirë e cila i takon, e drejta për punë.
Ligji mbi Arsimin Parauniversitar në Republikën e Kosovës nr. 04 / L – 032 / 2011, neni 35 pika 4 e obligon DKA që në komisionin për zgjedhjen e mësimdhënësve, pos drejtorit të shkollës të përfshihen edhe përfaqësuesit e Këshillit Drejtues të shkollës përkatëse, e cila nuk ka ndodhur në asnjë rast të vetëm në Komunën e Prizrenit . Ky anashkalim i dispozitave ligjore është i qëllimshëm ngase në të gjitha rastet e krijimit të marrëdhënies së punës për mësimdhënës, vendimmarrja është arbitrare, politike dhe klienteliste. Komisioni është formal, sa për ta “ përmbushur” një dispozitë ligjore, ngase vlerësimi – poentomi bëhet sipas kërkesës së “shefit” – drejtorit të DKA , i cili kuptohet duhet t’i përmbahet interesimeve klienteliste të shefave të tjerë të lartë komunal, duke i refuzuar kandidatët e kualifikuar, vetëm se nuk janë anëtar apo mbështetës të partisë në pushtet, për më keq shumë vende pune nuk publikohen , me qëllim të sistemimit të klientelës.
Komuna e Prizrenit dhe DKA, duke e parë se politizimi, arbitrariteti dhe klientelizmi në vendimmarrjet e tyre, janë të dukshëm për publikun dhe organet gjygjësore, s’ fundmi kanë filluar t’i kërcënojnë të gjithë ata kandidatë – aplikues, të cilët “ guxojnë ” të kërkojnë rezultatet e intervistimit ( vlerësimin – poentimin ) dhe qasjen në dokumentacionin e konkursit. Ky veprim i njëanshëm dhe arbitërar bije ndesh me Ligjin për Qasjen në Dokumentat Publike ( dokumentat zyrtare ) nr. 03 / L – 215 të Republikës së Kosovës – neni 4, njëherit është veprim jokushtetues , bije ndesh me dispozitat e Kushtetutës së Republikës së Kosovës, neni 41 – e drejta e qasjes në dokumente publike, në vete përmban elemente të veprës penale, rrjedhimisht zyrtarët e DKA, të cilët janë duke e penguar dhe pamundësuar qasjen e kandidatëve – aplikuesëve në dokumentacionin e konkursit, janë duke konsumuar elemente të veprës penale.
Njoftimi i kandidatëve pjesëmarrës në konkurs vetëm përmes një njoftimi formal, të publikuar në tabelat e shpalljeve në DKA , ku shënohet vetëm emrin i kandidatit “ të pranuar’ në punë, pa ju ofruar atyre, asnjë e dhënë tjetër lidhur me konkursin përkatës ( kriteret e vlerësimit, numrin e pikëve të kandidatëve konkurues, udhëzimet juridike për të drejtën e kundërshtimit etj.) është jo ligjor dhe arbitrar. DKA e ka obligim ligjor, që secilin kandidatë pjesëmarrës në konkurs, ta njoftoj individualisht përmes vendimit përkatës, me vendimmarrjen – rezultatin e konkursit ngase konkurrimi dhe e drejta e ankimimit janë individuale.
Nuk ka asgjë më johumane, abuzive dhe korruptuese se shfrytëzimi i postit – pushtetit dhe i fuqisë politike për të përndjekur në mënyrë selektive të gjithë ata / ato që mendojnë ndryshe , bile edhe fëmijët dhe të afërmit e tyre , në anën tjetër përmes makinacioneve, rrenave dhe mashtrimeve me e fsheh korrupsionin , abuzimin apo klientelizmin e vetë dhe të njerëzve të veshur me pushtet.