Presidentja e Republikës Atifete Jahjaga, në kuadër të procesit të lehtësimit të diskutimeve me liderët e partive politike parlamentare, priti sot në takime të veçanta kryetarin e LDK-së, Isa Mustafa dhe kryetarin e AAK-së, Ramush Haradinaj, me të cilët bisedoi për rrugën drejt krijimit të institucioneve të vendit.
Sipas një njoftimi nga ky takim, presidentja Jahjaga tha se zgjidhja e shpejtë e nyjës institucionale do t’i mundësonte Kosovës që të përmbushë obligimet e saj karshi qytetarëve të vendit, por edhe bashkësisë ndërkombëtare dhe do të përshpejtonte rrugën evropiane të saj.
Më tej ajo tha se ”liderët e partive politike parlamentare dhe deputetët e Kuvendit të Kosovës duhet të gjejnë zgjidhje konform kuadrit kushtetues dhe vendimeve të Gjykatës Kushtetuese, si dhe duke iu përmbajtur parimeve dhe vlerave mbi të cilat është ndërtuar shteti i Kosovës.
Presidentja Jahjaga tha se Kosova nuk mund të lejojë krizën edhe politike edhe mbi të gjitha financiare e buxhetore, sepse kjo do të dëmtojë vetë qytetarët e Kosovës edhe partneritetin strategjik ndërkombëtar”, thuhet në fund të njoftimit.