Radhëve të zyrtarëve të LDK’së që po kërkojnë ndryshimin e marrëveshjes së LDK’së me Bllokun është edhe Kryetari i Degës së LDK’së dhe i Komunës së Lipjanit Imri Ahmeti. Në një intervistë për Express, ai thotë se strukturat e LDK’së po kërkojnë emrin e Isa Mustafës si Kryeministër për tejkalimin e bllokadës politike. Ai thotë se as Haradinaj nuk duhet të bëhet pengesë për formimin e Qeverisë së re
Express: Zyrtarë të LDK’së, i fundit Muharrem Sfarqa, tha se marrëveshja e Bllokut duhet të ridizajnohet dhe që Isa Mustafa të votohet për Kryeministër. A është duke shkuar në këtë drejtim marrëveshja e Bllokut?
I. Ahmeti: Në fakt, interesi i jonë i përbashkët dhe i gjithë qytetarëve, në veçanti e Bllokut, është ruajtja e kësaj marrëveshje. Synimi i përbashkët është ndërrimi i kësaj qeverisje. Dinamika e realizimit të kësaj marrëveshje si duket do të ketë nevojë të ridizajnohet. Pak është e rëndësishme për emra të përveçëm, do të jetë Ramush Haradinaj apo Isa Mustafa. E rëndësishme është të krijohet Qeveria e vendit me figura të reja që ndërrojnë këtë gjendje. LDK nuk ka emër tjetër për Kryeministër përpos Isa Mustafës. Besoj se nuk duhet të jetë pengesë as emri i Ramushit e as emri i Isës apo i kujtdo qoftë, por duhet të gjejmë një zgjidhje që do ta zhbllokonte situatën në Kosovë. Normalisht, në LDK ka zëra dhe janë të interesuar të zhbllokojnë situatën politike me figurën e Isa Mustafës për Kryeministër.
Express: Pse tash po kërkoni të ridizajnohet kjo marrëveshje pasi dihet se mund të ketë edhe kundërshtime?
I. Ahmeti: Nevoja që njerëzit të mos jenë bllokues të procesit detyrimisht na bien në situatën që ne detyrimisht duhet ta rikonfigurojmë këtë marrëveshje. Gjithmonë, ne duhet ta ruajmë gjithë Bllokun sepse interesi jonë i përbashkët është që të ndërrohet kjo keqqeverisje.
Express: Por, zyrtarët e AAK’së kanë dalë kundër ridizajnimit të marrëveshjes së Bllokut?
I. Ahmeti: Nuk besoj se duhet të jenë individët pengesë për ridizajnimit dhe zhbllokimit të kësaj situate. Nuk po flasim për emra të përveçëm, por flasim për procesin. Nëse ndonjë individë paraqet problem në proces, besoj se duhet të gjejmë mirëkuptim dhe të tejkalojmë këtë situatë në favor të zhbllokimit të situatës politike.
Express: Sot, Ramush Haradinaj tha se ridizajnimi i marrëveshjes së Bllokut është shpikje e PDK’së. Cila është përgjigja juaj?
I. Ahmeti: Nuk mund të prejudukoj ide e kujt është, por nevoja e rishikimit dhe gjetja e një rruge për zhbllokimin e situatës është çështje në vetvete. Esencile është që individët nuk duhet të bllokojnë proceset sepse interesi nuk është individual sepse interesi është kolektiv. Në rastin kur interesi është kolektiv atëherë besoj se individët duhet t’i abstrahojnë interesat personale në kuadër të interesave të përgjithshme.
Express: Mirëpo, nëse bllokada vazhdon atëherë Presidentja do të shpallë zgjedhjet?
I. Ahmeti: Të gjitha partitë politike duhet të jenë të gatshme edhe për zgjedhje. Megjithatë, nuk është interes i vendit që të shkohet në zgjedhje dhe unë sa po e kuptoj asnjë parti politike nuk është duke i shtyrë proceset kah zgjedhjet por secili po mundohet të gjejë zgjidhje këtij ngërçi aktual.
Express: Sa e ka dëmtuar kjo bllokadë politike Shtetin e Kosovës por edhe komunat, njërën prej të cilave e udhëhiqni ju?
I. Ahmeti: Praktikisht, është e vërtetë se ka pengesa jashtëzakonisht të mëdha për shkak të kësaj bllokade të nivelit qendror. Realisht, çdo ditë e më shumë që vonohemi është në dëm të qytetarëve, është në dëm të zhvillimit të vendit. Edhe interesi jonë si Kryetar të komunave është që një orë e më përpara të zgjidhet ky problem dhe të formohen institucionet e reja.